‘A SCIALATA

di Franco Blefari


‘E jorna nostri ndav’assai cotrari,
chi non sannu chi era ‘a bumbuleglia;
comu non sannu ch’eranu i landrari,
o chi significava pascareglia.

M’accorgia stamatina, a mmatinata,
quandu vitti venir’’i supa e ‘i sutta,
tanti cotrari cu ‘na burza unchjata,
d’arancini, nutella e tanta frutta.

Allura si diss’eu: bona “scialata”,
ma parzi ca parlai cu ‘nu turduni:
nugliu sapia chi era la sgranata
chi si facìa ‘u jornu du’ pascuni.

E allura tornai arretu a glià jornata
e a com’’u tempu li perzuni muta:
quandu, cu ‘nu sarbettu e ‘na frittata,
ccocchj gruppu ‘i sarzizzu e ccocchj guta,

jèvumu a pascareglia a mmatinata,
a ppedi, e cu ‘na vogghja ‘i ndi scialamu,
ccocchj gazzusa, ch’era già sbentata,
e chigliu ben’’i Diu pamm’’u mmurramu.

Tutti assettati sutt’a ‘na livara,
‘nta ‘na campagna di χjuri vestuta!
c’’a cuntentizza chi currìa a χjumara,
puru si la tuvagghja era cunduta…

17/5/2015




Copy Protected by Chetan's WP-Copyprotect.