Com’era bella Pascareglia ‘i ‘na vota, quandu, cotrari, jemu a Parruni o a Varraru cu ‘nu sarbettu ttaccatu d”i quattru pizza chjnu ‘ì nenti, ma d’ogni ben”i Diu! Non mancava ‘a frittata, chi ognii mamma si levava prestu, ‘a matina prima ‘i partimu, pamm”a faci ‘nta padeglia, chi ‘u profumu si sentia nta tutt”u vicinatu. Ndavia ‘na gazzusa “Capugrecu”, ccocchj menzu metru ‘i sarzizzi ch”i ndavevumu calatu ‘u sabatu santu,com’era tradizioni , a mmenzojornu, prima ‘i risurcita ‘u Signuri, chi ncignavanu già ‘i culano ogghju, cu’ primu suli d’aprili. Ndavia ‘a guta cu l”ovu mentutu nto menzu, bella e russa com’a facci ‘i ‘na figghjola schjetta. E ndavia puru ccocchj ffetta ‘i pan”i casa…Jemu ‘a scialata, o pascareglia, c”a gioia ‘i mmurramu ‘u mangiari nostru cu chigliu ‘i ll’atti. Sulu ca jeu, chi portava sempi mortatella ( ca ndavia ‘a puticgha)mi rruffianava sempi cu l’amici chi portavanu supprezzati chjni ‘i pipi macinatu, capicogliu e casu friscu. Atti tempi, pascareglia ‘i ‘na vota!
Continua dopo la pubblicità...