di Franco Blefari
Continua dopo la pubblicità...
‘Nta chisti tempi nigri,
è tuttu in agonia,
mancu ‘nu cani trovu
pammi ciangi cu mmia.
Staci morendu ‘a vita,
nd’alluntanamm’ ‘e Diu,
e ‘a notti ‘nt’ogni ruga,
screpita ‘u cucuviu.
‘A maffia ccà cuntrolla
quasi tutt’i spitali:
ndi portamu d”a casa
pur’i medicinali.
Simu senza autostrati,
e ‘u cielu è sempi griggiu,
ca sunnu sempi fermi
sup’’a Salernu-Riggiu
Simu senz’areoporti,
e ‘a ferruvia è ‘nu lussu,
chi pammi jam’’o Nordi
pigghjamu l’autabussu.
Simu senza lavuru,
tutti disoccupati,
m’a ura d’’i lezioni
c’’a maffia schierati..
Simu senza spiranza,
ndi misiru ‘a serretta,
ca maffia e politica
caminanu mbraccetta..
‘A maffia non è sulu,
tra Cammara e Senatu:
puru cu’ vol”i trasi
è ancora cchjù affamatu…
Si volarria ‘nu mitra…
non basta cchjù votari,
ca nui, si igli mangianu,
ndavimu a penijari…
8/9/2017
