di Franco Blefari
Continua dopo la pubblicità...
Stasira Benistari esti cchjù bella,
pari ca ‘nu cumbitu staci fandu,
comu quandu ‘nta piazza, ‘e temp’’i tandu,
tutt’anavia bagliava ‘a tarantella.
Mò chi lapriru ammata li catoja,
sent’‘a vita chi torna ‘nt’ogni vicu,
‘nc’è ‘na luci gliumata ad ogni spicu,
puru si nuglia χjocca cchjù mbatoja.
Avant’’a chjesia e puru ‘nta Tarrata,
‘nta Timpa, l’Ariaporu e tuttu ‘ntornu,
senti vuci parlari fin’a jjornu
e ‘a luna è quasi sempi risbigghjata.
E’ ammata ‘nu prisepiu, stu paisi,
puru si gli papàtuli spariru,
dassandu ‘nte catoja ogni rispiru
e ccocchj ngusciu, sutt’e travi, mpisi.
E d’ogni porta aperta ‘i sti catoja,
pari c’all’improvvisu è prontu ’i spunta
‘nu sumeri, ‘na crapa o ccocchj troja,
‘nu massaru chi ncigna pammi cunta…
Veni sonandu mò ‘nu mandolinu..
cunta ‘na storia antica ‘i ‘na figghjola..
ch’esti lu vecchju tangu di Manola,
Mastru Nunziu e Giannu Musulinu
‘U cielu è tuttu quantu ‘na vitrina,
sbrendurijanu i stigli allegramenti;
penzati vui com’ennu risplendenti,
chiglia notti chi passa la Rigina…
Ch’era bellu ‘u paisi di ‘na vota!
chigliu paisi glià era ‘n’incantu,
quandu ‘na fisarmonica o ‘nu chjantu
cogghjia glia genti mia bonistarota…
E ch’era bellu s’’i ‘na porta chjusa,
nescìa ccocchjunu ‘i gliu paisi anticu,
chi, mbardand’’u sumeri, pala e picu,
partìa ’i lavura ammunt’’a carcamusa…
.
29/10/2015
(PS- Questa poesia è dedicata a chi ha detto che io infango il nome di Benestare )
